Bran - Le chevalier Bran






Ar marc'heg Bran 'zo bet tizhet
E kad Kerlouan ma 'z eo bet,

E kad Kerlouan 'tal ar mor
'Voe tizhet mab bihan Bran Vor.

Ha daoust d'hon trec'h 'voe kemeret
Ha tramor e voe degaset

Ha pa voe tramor degouezhet
Eññ a ouele 'n un tour serret :


- Va c'herent a drid hag a youc'h,
Ha me war va gwele! A, you!

Me 'garfe kaout ur c'hannader
A zougfe d'am mamm ul lizher.

D'ar c'hannader pa voe kavet
Ar marc'heg en deus kemennet:

- Dilhad all va den, a wiski,
Dilhad klasker-boued a-zevri;

Va bizoù 'gemeri ivez,
Va bizoù aour evel arouez.


Ha d'am bro 'dal ma tegouezhi
D'am mam itron en diskouezi.

Ha mar deu va mamm d'am daspren,
Kannader, lak banniel e gwenn;

Met siwazh din, mar ne zeu hi,
Ur banniel du eo a savi.


Pe zegouezhas e Bro Leon
Edo o koaniañ an Itron,

Edo gant he zud ouzh an daol,
An delennourien en o roll.

_ Noz vat deoc'h, Itron an ti-mañ
Setu bizoù aour ho mab Bran,

E vizoù koulz hag ul lizher,
Ret eo e lenn, e lenn e-berr

- Tavit, telennourein, ho son;
Glac'har vras a o em c'halon!

Tavit telennourien, buan,
Paket va mab ne ouien mann!

Ra fardor ul lestr din fenoz,
Ma treuzin ar mor antronoz!


Antronoz, diwar e wele
An Aotrou Bran a c'houlenne:

- Gedour, gedour, din lavarit,
Lestr ebet o tont ne welit?

- Aotrou marc'heg, ne welan-me
Nemet ar mor bras hag an neñv.

- Gedour, gedour, din lavarit,
Lestr ebet o tont ne welit?

- Aotrou marc'heg, ne welan tra
Nemet morevned o nijal!

An aotrou Bran a c'houlennas
Ouzh ar gedour d'abardaez c'hoazh:

- Gedour, gedour, din lavarit,
Lestr ebet o tont ne welit?

Ar gedour gaouiat pa glevas
C'hoarzhin drouk outañ a reas:

- Ul lestr a welan-me pell, pell,
Hag eñ foetet gant an avel.

-  Na pe arouez? Lavarit krenn!
Ha daoust eo du, ha daoust eo gwenn?

_ Aotrou marc'heg, 'vel ma welan,
Du eo, me en tou deoc'h ruz-glaou-tan!

Ar marc'heg kaezh p'en deus klevet,
Na mui na ken n'en deus komzet.

Distreiñ a reas e zremm c'hlas
Ha gant an derzhienn e krenas.


Nag an Itron a c'houlenne
Digant keriz pa zouare:

- Petra nevez a zo amañ
Pa glevan kleier o tiñsañ?

Un den kozh en deus lavaret
D'an itron pa'n deus he c'hlevet:

- Ur marc'hek paket 'oa amañ,
Mervel en deus graet en noz-mañ!

N'oa ket e gomz peurlavaret,
Etrezek an tour eo pignet,

En ur redek, o ouelañ ken,
Dispak-kaer ganti he blev gwenn,

Ken e oa ar gêriz souezhet
Souzhet-meurbet ouzh he gwelout,

Gwelout un Itron divroat
Oc'h ober kañv a-hed ar straed,

Ken e lavare pep unan :
Piv eo houmañ, hag a-beban?

An Itron baour a lavare
Da borzhier an tour pa errue :

- Digor, digor prim an nor din!
Va mab, va mab, ra e welin!

Pa voe digoret an nor vras,
War gorf he mab en em strinkas,

Hag e vriata a reas
Ha biken goude ne savas.


War vaez ar stourm e Kerloan
'Zo un dervenn a-us d'al lann,

Un dervenn el lec'h ma kilas
Ar Saozon rak dremm Even Vras.

War an dervenn pa bar al loar,
Bep noz 'n em zastum evned-mor,

Evned-mor du o fluñv ha gwenn
Gant ul lommig gwad war o fenn.

Ganto ur Vranez gozh du-louet,
Ganti ur Vran yaouank kevret;

Skuizh o daou ha gleb o eskell,
O tonet eus tramor, eus pell,

Hag an evned a gan ur c'han,
Ken kaer ma tav ar mor ledan.

Ar c'han-se 'n ur vouezh int a gan
Nemet ar Vranez hag ar Vran.

Hag ar Vran en deus lavaret:
_ Kanit, evnedigoù, kanit!

Kanit, evnedigoù ar Vro,
C'hwi pell eus Breizh n'oc'h ket maro!