Ened Rosporden











D'ar seizhvet deiz warn-ugent demeus a viz C'Hwevrer
Eus ar bloaz mil pevar c'hant pevar-ugent ha c'hwec'h
En devezhioù meurlarjez, er gêr a Rosporden
A zo c'hoarve'et ur reuz bras. Selaouet, kristenien;

Tri den yaouank dirollet oa en ostaleri,
Ha gant gwin 'leizh ar podoù oa o gwad o virviñ,
O vezañ evet a-walc'h hag o c'hofoù karget;
"Gwiskomp-ni krec'hen loened ha deomp-ni da redek!"

An trede paotr anezho, ar paotr an disterañ,
O wele e vignoned o pellat dioutañ,
A yeas rakal d'ar garnel, e benn en deus laket,
E benn 'barzh ur penn-maro; euzhus 'oa da welet!

E toulloù an daoulagad e lakas daou c'houlou,
Hag e lamme 'vel un diaoul, e-kreiz tre ar ruioù.
Ar vugale a dec'he en ur spont bras razañ,
Hag an dud reizh o-unan a rede dirazañ.

Ober a rejont o zro hep dont da'n em gaouet,
En ur c'horn eus ar gêr-se pa oant o-zri degoue'et.
Neuze youc'hal! Ha lampat! ha godisal o-zri:
"Aotrou Doue, pelec'h out? Deus ganeomp da c'hoari."

Doue skuizh oc'h o gwelet a skoas un taol pounner,
Ken e roas ur grenadenn d'an holl dier e kêr;
Koventiñ 'reas 'n o  c'halon an holl vourc'hizien,
Ken na gredjont 'oa erru diwezh eus ar bed-men.

Distreiñ 'reas an disterañ, a-raok mont da gousket,
Da zegas ar penn-maro en-dro 'barzh ar vered;
Hag eñ da vont d'e bediñ, 'n ur dreiñ e gein dezhañ:
"Deus d'am zi 'ta, penn-maro, deus arc'hoazh da goaniañ."

Neuze d' di da gemer e baouez ez eas,
E sailhas 'barzh e wele, 'hed an noz e kouskas.
Tronoz vonton pa savas, eñ mont da labourat,
Hep koun 'bet mui d'an derc'hent, kennebeut d'an ebat.

Eñ mont da grog en e forc'h, eñ mont da labourat,
O kanañ war bouez e benn, o kanañ disoñj mat.
Hogen, pa oa 'n dud ouzh taol, war-dro an noz digor,
E klevzont unan bennak a skoe war an nor.

Ar mervel a savas prim evit digor dezhañ,
Kement e voe estlammet, ma teuas da gouezhañ,
Ha daou zen all a lammas raktal 'vit e sevel,
kement e voent strafuilhet ha ma voe ret mervel.

Kerzhañ 'rae an Anaon kreiz an ti es-dale:
"setu me deut da goniañ, da goaniañ genout-te.
Deomp-ni 'ta, ma mignon kaezh, n'eo ket pell ac'hane,
Deomp-ni hon-daou d'am zaol-me a zo savet em be."

Ne oa ket e c'her gantañ, siwazh, peurachuet,
Pa yudas an den yaouank, en ur spont garv-meurbet;
Ne oa ket e gomz gantañ, e gomz peurlavaret,
Pa gouezhas krenn war e benn ar paour kaezh diframmet.