Joe Derocher


wîcihitowin (Sharing)



**********


1. ôma âcimowin kayâs kî-ispayin, nikâwiy awa niwîsâmik ta-wîcêwak manitow- sâkahikanihk (Lac Ste Anne) isi. kîkwây êtikwê ê-pakosêyimit, kâ-nitawêyihtahk ta- wîcêwak. mâcika nikoskohik kâ-pê-nâsit, ê-pê-naskwênit. niwihtamawâw êkâ ê- osôniyâmiyân êkwa mîna ê-ahkosipêyân, ê-kî-minihkwêyân otâkosîhk isi. êkosi nikâwiy nititik namôya katâc ta-mâmitonêyihtamân, misawâc wiya kahkiyaw kîkway ê-wî- wawêyîstahk. piyisk êkosi niwâpamik nikâwiy. niwawêyîn manitow-sâkahikanihk ôma ta- itohtêyân.

2. êkwa ôma kinêhiyâwiwinaw; kîspin kîkway ê-ayâyan, kimiyâw ana awiyak kâ- kwêtamât. namôya wihkâc awiyak kîkway ohci-akihtamawâw. êkosi mâna pêci-nâway ê- kî-wihtamâkawiyâhk. ta-miyo-otôtêmâyâhk awiyak kâ-pê-kiyokêt nîkinâhk. ahpô awiyak kâ-kwêtamât ta-nipât, ta-kapêsihâyâhk, ta-asamâyâhk awiyak, kâ-nohtêkatêt. ta-miyo- pamihâyâhk pikw âna awiyak. miywâsin mistahi ta-nôkohtât awiyak ê-miyotêhêt. 

3. ispayiw ati êkwa, êkâ ê-kî-têpipêyân ahpô sîwâpoy. mistahi ninâh-nohtêyâpâkwân êyikohk ê-ahkosipêyân. nikakwêcihkêmon êkwa mahti kaskâpahtêw-sâkahikanihk (Smokey Lake) ta-kî-ati-nakîyâhk. ê-wî-atâwêyân kîkway ta-minihkwêyân. nikoskohik nikâwiy, ê-pê-miyit pêyak môtêyâpisk sôminâpoy. êkosi êtikwê ê-kî-itêyihtahk, ôcênâsihk ta-pê-nâh-nakîyân. nitatamihik, sêmâk nitotinên anima sôminâpoy. nikoskohik awa nikâwiy kâ-itôtahk, êkosi kiyâm nikiyâmapin. 

4.kêtahtawê kâ-wâpamâyâhk pêyak nâpêw ê-ati-mostohtêt. kâ-itwêyân oskac awiyak kâ-kwêtamât, sêmâk ta-wîcihiht ta-nâkatohkêhk. ispayin êkwa êkosi ta-nâkatohkêyâhk awa. ninaskwênânân awa nâpêw ê-pôsihâyâhk. sêmâk yohtênam nîmâwiwat nikâwiy ê- asamât pahkwêsikana, kahkêwak êkwa nihtiy minahêw. mitoni atamihêw. 

5. ati-âcimow awa nâpêw, êsa tipiskohk isi ê-kî-kimotamâht kahkiyaw osôniyâma. ê-kî- paminawasot êsa nikotwâsik pîsim, ê-kî-atoskêt. êkwa ôma kâ-pê-mostohtêt kâwi Edmonton isi. mitoni nikitimâkihtawânân. 

6. piyisk êkwa nitati-kitânân anima pêyak môtêyâpisk sôminâpoy awa nâpêw asici. mitoni êkwa nimiyo-nanâtawihon. cîki êkwa St. Albert ê-ayâyâhk, paskêmon mêskanaw manitow-sâkahikanihk isi. ninohtê-wîci-minihkwêmâw pêyakwâw awa nitôtêm pwâmayîs paskêwêhitoyâhk. êkosi nitati-nakînân ôtênâhk (St. Albert). 

7. ê-kî-minihkwêyâhk êkwa êkosi ispayiw ta-paskêwêhitoyâhk. kahkiyaw êkwa nimâmawipayinân ê-atamiskawâyâhk awa nâpêw. sisikoc kâ-mâtot ê-môskwêyihtahk ê- miyo-pamihiht. piyisk kahkiyaw nimôskomikonân. mâskôc anihi kî-wâpamikawiyâhk, tânisi êtikwê ê-isinâkohcikêyâhk.

8. êkosi pwâmayîs ê-sipwêhtêt êkwa nimiyâw awa nâpêw nêwâpisk ê-kî-ayâwak. nitikonân misawâc kâwi ê-wî-tipahamâkoyâhk mayaw osôniyâmici. namôya katâc nititâw, mâka ta-âsônamawât anihi sôniyâsa kotaka awiya. ta-âpacihât pikw îsi wî-itâpacihâci, êkwa mîna ta-wihtamawât pêyakwan êkosi ta-itôtamiyit, ta-âsônamâkêt awiya, kotaka ta- miyât kwêtamâyici. êkosi pîkiskwêyâhk êkwa êkosi nisipwêhtânân ê-miywêyihtamâhk ê-kî- wîcihâyâhk awiyak ê-kwêtamât.

9. mêkwâc nikâwiy ê-pah-pimâtisit, nikâh-kiskisomik mâna êkwa ôma êkwa mâna ê-kî- itwêt, "tânitê êtikwê êkwa ôma ana sôniyâs kâ-kî-mêkiyan?"