Flora Gladue


Sohkâtisiwin (Strength)


************


1. pêyakwâw êsa mâna nêhiyawak, paskwâw-sâkahikanihk ohci k-ôsihtâcik astâhcikowin, ita mâna ê-ki-kanawêyimâcik îwahikana, êkwa mînisa kâkwayiwatihk, ê- asowâtêyiki. nimosôm êsa k-ôsihtât pêyak êkwatowahk astâhcikowin.

2. âh-âskawi êsa mâna nitawâpinikêw mahti kîkway pisiskiwa ta-tasihkamiyit. tâpwê êsa kêtahtawê pêyakwâw ê-takwâkik kâ-pê-kîwêt, ê-pê-âcimostâkoyâhk kîkway pisiskîsa ê-kâh-kimotiyit. namôya kêhcinâhôw nimosôm, kîkwây itowahk pisiskîsa. itêyihtam wiya wâkâyôsa ahpô okihkwahakêwa. 

3.pîkwêyihtamihik, iyikohk kîkwâsk ê-pimohtêt kisik ê-pîkiskwêt. namôya ninohtê- mikoskâcihânân. piyisk êkwa nakîw ê-wî-wanihikêt pâskisikan ê-wi-âpacihtât ê-itwêt. kayâs ayisk mâna 1900's mêkwâc, nimosôm kî-ayâw pâskisikan mâna nîkân ohci ê-kî- wiyaskinahtât, êkwa môsosiniya piko ê-kî-mosc-ôsihtâhk. aspin ê-wayawît, kî-atimohtêw mêskanâhk. 

4. astâhcikowinihk ê-takohtêt êkotê, êkosi sêmâk mâci-tahkopitam opâskisikan mîtosihk, itastâw itêhkê iskwâhtêmihk ita ôhi k-ôh-pâh-pihtikwêyit pisiskîsa. pîminahkwânis êkwa ohci tahkopitam tasinikan êkwa kotak pîhcayihk iskwâhtêmihk. pokw âna kîkway ta- tasêwêpiskahk anima pîminahkwânis, êkosi ta-tasipitahk pâskisikan ita pimohtêci. 

5.ê-kî-kîsastât owanihikan êkwa, êkosi nimosôm ati-sipwêhtêw; kêtahtawê kâ- môsihtât kîkway ê-tahtawâkiskahk. êcik ôma ê-tasêwêpiskamâsot owanihikan kâ-kî- kîsastât ôma. namôya kî-kisiskâ-waskawîw nimosôm, kâ-tasêwêpiskahk pâskisikan, ositihk kâ-pâskisokot. 

6. sêmâk kêcikowêpinam omaskisin nimosôm, ê-nitawâpinahk osit, tânisi ê-itatahahk. kâ-wâpahtahk oskan ositihk. sikwataham oyîkisitâna ê-mostakotêyiki êkosi namôya kîh- pimohtêw. mitoni êkwa wî-kakwê-kisiskâ-waskawîw iyikohk mihko ê-wayawîkotêyik ositihk ohci. 

7. manipitam pahki oskotâkay êkwa ê-tahkopitahk osit nimosôm. sîhtwahpitam, tânisi ê-ka-pimohtâkêt osit, êkâ mistahi ta-isi-wanihtât omihkom nimosôm, sôskwâc namôya kiskêyihtâkwan. mâka piyisk kaskihow ta-kîwêt. mâmaskâc, namôya tâh-tâpwêhtamihk ê-kaskihtât nîso tipahaskân isi ta-isi-kîwêt, êkosi ta-isi-pistahosot awiyak. mâka wiya kî- kaskihtâw nimosôm.

8. pahkaci ê-takohtêt wîkihk êkwa, otinam omôhkomân iskotêhk astâw kotawânâpiskohk. tâpwê piko kêcikonam otahkopison êkwa anima ê-mihkwâpiskitêyik ohci môhkomân mâh-manisam pâh-pêyak oyîkisitâna anihi kâ-mostakotêyiki. sêsêskinâkosiw tâ-wâpamiht. nitaki wîpac êkospî ê-kîsahkamikisit nimosôm, ê-mâh-mânaskihkowêt, mîna ê-kî-mâh-mâcît, wîpac ê-takwâkiniyik. ahpô êtikwê nikâh-kî-nohtêkatânân êyako ê-pipohk êka êkosi kîh-ispayik. 

9. anohc êkwa mâna mâh-mâmitonêyihtamâni niwî-itêyihtên, ahpô êtikwê kîkway ê-kî- akopisot maskihkiy êkâ êkoyikohk kâ-mihkowit osit mîna ê-kî-kisiskâ-mîyw-âyât mâna. 

10. âha, nimosôm tâpwê mistahi kî-sohkêyimow mîna kî-sohkitêhêw, ôta ohci niyanân.