Joe Merasty

nanâskomowin (Thankfulness)



************


1. kayâs aspin ôma, nîstanaw niyânosâp ê-itahtopiponêyân êkospî. ê-wîstihkêyân mêkwâc amisko-sîpîhk kîwêtinohk ohci paskwâw sâkahikanihk. maskosîs ê-pisiniyân ôma êkwa namôya ê-kî-otinamân, namôya mîna nânitaw ê-wî-isi-wayawîpayik, ê-kî- itohtahikawiyân paskwâw sâkahikanihk, sôniyâw-okimânâhk maskihkîwiyiniw ta-wâpamak. êkosi! êkota kâ-pêhtamân nêhiyawak mîna âpihtaw-kosisânak ê-otinihcik ta-nitawi- nôtinikêcik, akâmaskîhk.

2. mitoni nicihkêyihtên, êkosi nimasinahên masinahikan, ê-masinahosoyân ta-nitawi- nôtinikêyân nîsta, êkospî oskac kâ-nôtinitohk. Jim Merasty awa pêyak, Alex Bear, êkwa nîcisân Alphonse Merasty wîstawâw kî-masinahosowak. êkosi nikiskinwahamâkawinân ôtê Saskatoon Light Infantry (SLI) ohci. êkotê ohci Italy, Sicily, êkwa Holland ê-at- îtohtêyân. 

3. pêyakwâyak kâ-pimâcihoyâhk Italy isi, mitoni ê-cacayâwâsik mêskanaw kâ- pimâcihoyâhk sisonê wacîhk. namôya tâpwê kwayask kî-wâpahtam mêskanaw ana opamihcikêw êyikohk ê-apisâsiki wâsênamânisa otâpânâskohk. mitoni napatê ê-misi- kîskahcâk mêskanaw, kâ-patotêpayiyâhk êkotê isi. âpihtaw êyikohk akocin otâpânâsk, kêkâc ê-cahkâskopayit. kwayask ani nisêkisinân. nitaki ê-nihtâ-pamihcikêt opamihcikêw, kwayask kâwi ê-âhcipitât otâpânâskwa. 

4. kihtwâm mîna kêkâc nikî-misihonân, êkotê Italy, ê-wanikiskisiyân tânisi t-êtwêyan icwêwinis mâna pêyak ê-âpacihtâyâhk t-êtwêyâhk tôh-kiskêyimikawiyâhk. ê- kakwêcimikawiyâhk, êkwa namôya niya nikiskêyihtên; nîswâw piyisk ê-kakwêcimikawiyân, pêyak niwîcêwâkan kâ-misi-têpwêt, "Judy," êwako êsâni icwêwinis anima takî-itwêyân. nimiyonikânân ani êkospî. êkâ ayisk nânitaw kî-ay-itwêyâhk êkosi piko ta-kî- pâskisokawiyâhk. 

5. ôma êkâ kîkway k-ôsîhtâyâhk, k-âywêpiyâhk, misiwê mâna nikî-pa-pâmohtânân ê- wâh-wâpahtamâhk kayâsi-wâskahikana, kâ-sâsîkwaskatahamihk. âtiht mâna kî-kâh- kimotiwak, mâka wiyawâw, "The Canadian Army," namôya ohci pakitinamwak awiya êkosi ta-itôtamiyit. kotaka mîna Rome nîkî-wâh-wâpahtênân wâskahikana, "misi-kayâs-âya" êkwa, "The Leaning Tower of Pisa," mîna. 

6. Alphonse awa mîna pêyakwâw kî-micimisêkisiw. nitôkimâminân ana Sergeant Bailey (St. Walburg) êkwa ayâw êwako; êyakwâna kâ-kwêtawêyimât êkwa kâ-nitawi- miskawât ê-ayâhôkoyit asiskiy, ê-ohpwêkotêk. namôya ohci miywâyâw kâ-kî-micimisêkisit anima, êkosi simâkanis kî-itapiw, êkota kî-atoskêw iskohk kâ-pistahoht nanânisk ê-isi- tasinamiyit anihi kâ-kî-pistahokot. 

7. mitoni ninanâskomon ê-nahipayik kâwi ta-takohtêyân kâ-pôni-nôtinitohk. miton âni nimiywêyihtên ê-tahkoskêyân ôta askîhk kâwi. ê-kiyâmwahk mîna tipêyimisowin ta- wâpahtamân ispî kâ-takohtêyân Canada. 

8. mistahi kiyâpic nikâh-âcimon mâka kinwêsîskamik nikâh-nôcihtân ta-masinahamân. êkosi piko pitamâ kâ-wihtamâtân. namôya tâpwê niya ninihtâ-âcimon.