Koldo Izagirre



barrurantz dario
            ene zauriari
            odola
            barrurantz
            zulaketa hotz lehorrean
            odol geldi herdoilezkoak
            bere isiltasunari bihurtzen dizkio
            ezpainak
            
            Koldo Izagirre
            (Itsaso ahantzia)
             
            zuek ez dakizue zer den
            gauero kalenderaren numero bat tatxatzea
            eta ilun-jarioari
            tiro ezin emana
            
            zuek ez dakizue zer den
            norbaitek igurikiko digula
            sinetsi nahi izatea
            
            zuek ez dakizue zer den
            gizonaren negarra
            ilunabarra kopetari atxikitzen zaionean
            zuek ez dakizue zer den
            euria
            
            zuek ez dakizue zer den
            bakarrik egotea
            bakarrik
            bakardaderik ere gabe
            
            zuek ez dakizue zer den
            ezer
            zuek ez dakizue ezer.
            
            Koldo Izagirre
            (Itsaso ahantzia)
             
            ez dudala inoiz komunetako ate ostean deus izkribatu
            ez dudala inoiz neskarik ukitu begiekin ezik
            ez dudala inoiz ukabiletati negar egin
            ez diodala inoiz gauari musurik eman ezpainetan
            ez diodala inoiz arraun egin ametsak gaindi
            ez diodala inoiz bihotzari hatzazalik zorrozten utzi
            ez naizela inoiz ezertaz gozatu
            ez dudala inoiz ispilurik harrika apurtu
            ez dudala inoiz itsasoa orratz batez lehertu nahi izan
            ez dudala inoiz poeten bertsorik buruz ikasi
            ez naizela inoiz errekan biluzik bainatu
            ez dudala inoiz mapamundirik erre
            ez dudala inoiz lapurtutako motoarekin kopeta hautsi
            
            aitortzen dut
            da naiz.
            
            Koldo Izagirre
            (Itsaso ahantzia)
             
            hor
            haragi ikaratuaren hizkuntza
            poemaren ertzean laztandutako arrazoien lurrezko lokarria
            oraindik hor zaude
            erroitza isila ene zapaten itzalpean
            entzun itzazu eskuok
            udazkeneko barku isilak
            ilunabarretik atzerriratutako ametsen hondakinak
            ohostutako ezpainen sakonenean etzandako hitz guztietan deitzen 
            zaitut
            grifoak odolustutzen direlarik
            ilunabarra ari duzu eta ni ilunabarrak nago
            heriotzaren bezperan
            ilunabarra izan nahi duzun uharte biluzitik
            atzerriratua
            oraindik
            dei egiten dizut
            babes nazazu betazaletan.
            
            Koldo Izagirre
            (Oinaze Zaharra) zure adatsak
            haizearen zainak
            zure kopeta
            euriaren frontoia
            zure begiak
            argiaren dianak
            zure ezpainak
            bihotzaren betazalak
            zure besoak
            urezko lokarriak
            zure eskuak
            ene bizkarrezko zomorroak
            zure bularrak
            eguzki katibuak
            zure gerria
            Panamako kanala
            zure kaderak
            ene eskuen perigeoa
            zure sabela
            ene uhinen etzalekua
            zure iztarrak
            t-k erdibitutako izarrak
            zure belaunak
            60 watt bizki itoak
            zure ilunpeak
            gau kiskurrak.
            
            Koldo Izagirre
            (Itsaso ahantzia)
             
            musuak
            urtutako
            haizeak
            elektrikaturiko
            aterkiak
            larrututako
            xaguzaharrak
            izututako
            gruak
            urkatutako
            txatarrak
            amestutako
            ijitoak
            segatutako
            izarrak
            edoskitako
            hitzak
            ahantzitako
            haginak
            urratutako
            musuak
            
            Koldo Izagirre
            (Itsaso ahantzia)
             
            suzko usoek
            zure begiak datozen
            itsas itotik jaikitako pistia beltzen
            izarrek
            ezin dute
            ezin dute gaua iratzarri
            ateak
            zigarro-kearen sekretupetik
            kristal hautsien burdinbidera
            zerrail hotsik gabe
            oso poliki hertsi direnean.
            
            Koldo Izagirre
            (Itsaso ahantzia)
             
            teilatuak gurpilez eta zulatutako zenbakiz estaliak
            zorotasunaren adatsak leihoetan tantaka
            eta faro mutugorrak gorpuak sehaskatuz
            orratz zaunkarien berotasunean
            ezin ditut zure kaderak idatzi
            zure begietako icebergen azpitik
            igeri egin nahi nuke baina
            nire aberria zure irrifarra bada ere
            amatsen zapatek odol arrastoak uzten dizkigute
            esku apurtuetan.
            
            Koldo Izagirre
            (Oinaze Zaharra)