Teresita Irastorza



Ijitotxoaren globoak:
            gorriak, txuriak, beltzak...
            ijitokumeak ez du
            zazpi urte baizik
            eta amaren zapata
            handi handietan
            izkutatzen ditu
            ointxoak.
             
            Ijitotxoaren globoak:
            gorriak, txuriak,
            bi besterik ez.
             
            Ijitotxoaren globoa,
            gorria...
            (Globoa banintz
            zerura igotzeko)
             
            ¡¡¡Plaf!!!
             
            Gelditzen zitzaion
            globo txuria
            mozkorrak
            lehertu dio:
            gelditzen zitzaion ametsa?
             
            Nire nigarra
            ez da malkoetan
            begietara iristen;
            ez da zotinka
            ezpainetara igotzen.
             
            Nire nigarra
            ez da kolpeka
            nire eskuetara etortzen,
             
            hor, loturik gelditzen da
            eztarri inguru hortan,
            katiaturik
            mingain parean.
             
            Nire nigarrak
            barruantz ematen dituen
            kolpeak,
            barruan egiten dituen
            ituteak,
            barruan uzten ditu
            zotinak
             
            ez baida azaltzen
            nire nigarra
            hor dagoelarik.
            
            Teresita Irastorza
            (Gabeziak 39)
            Euri azpian
            gogoratu zintudan
            tanto busti haiek
            azal lehorrean
            hatzamarka
            hasi zirenean.
            
            Goardasolik gabe,
            zerura begira
            goizalde muga hartan
            
            nengoen
            
            besoak zabalik
            eri,
            dolorez;
            miñez
            hezur muinetan,
            minez
            hazkazal barnean
            nengoen.
            
            Hain fina zen
            goizaldeko lanbropean
            inoiz baino hutsago senti erazi ninduzun.
            Euri tanto haiek
            zekarten deusa,
            eta deus usaina
            basarkaratu nuenean.
            
            Euri ta zotin,
            malko eta trumoi
            heriotz gauean,
            bizirik senditu zintudan
            heriozpe gauean.
            
            Teresita Irastorza
            (Gabeziak 31)