Ella Torretta La manichen Per mezzo d'on amis ch'el cercava ona terrazza con piant esòtich per fà on servizi fotografich, ona mattina d'estaa me son trovada la cà piena de giovin. Si, perchè data la mia passion per la 'botanica' e la coltivazion d'ona particolar "essenza" seri pròppi mì quella scernida da on concors per dimostrà la manera de fai cress in vas e, se indovinavi ona lista de "quiz", vincevi on viagg per dò person in del paes da dove rivaven sti piant. La ditta l'avaria portaa: impiant di lus, fondai de carta per scond quell che interessava nò, macchin fotografich e on para de tosann...."i manichèn"! Dopo accòrd telefonich, ecco che riva la "troupe'' cont on badalucch de scatoloni, sacch, cavallett, lamped, fil, on gazzaghee de ròbba che impieniss tutti i spazi voeui del mè appartament. Hinn quatter giovinòtt e dò tosann che me garantissen de trà per ari el men possibil per minga stremenà i abitudin del nòster "menage" familiar. Hinn pien de sorris e gh'hann on bell farin quand me cerchen con gentilezza on quaicòss. Se moeuven per cà senza sbrottà: monten, proven, pizzen i lus, metten in d'on canton on para de ombrei pitturaa d'argent, tacchen i flash, misuren distanz... fann moviment precis e concordaa tra de lor domà cont on'oggiada. I dò tosann me domanden se poden doprà el bagn come "camerino". Se saren dent a ciav e dòpo mezz'ora, quand già tripillavi a l'idea che se fasessen pù vedè, ecco che compar la prima. Gent, che cambiament .... che splendor de tosa! Ona cascada de cavei biond a rizzolòtt ghe incornisen el bell faccin, tiraa a pomis, oeucc celest truccaa cont on ombrett ròsa-violett, on bocchin disegnaa cont on lapis ross, la gh'à sù on vestii de vellù ròsa ch'el mett in risalt i dent e foeura del sò còrp, sora on spolverin sberlusent e cangiant dal ròsa al ross... se pò minga fà a men de rimiralla... la par vegnuda foeura da la copertina d'on giornal de mòda! L'altra inveci morettina cont i cavei negher a franzetta come la Josephin Backer la se moeuv 'me ona bissa, la se guarda in gir come se la cercass on quaicòss de special... insòma la gh'ha ona mettuda pròppi de quei che fann girà el cô ai giovinòtt... Finalment tacchen a fà i ripres e l'è on seguità denter e foeura del bagn... ogni vòlta cont ona mettuda diversa e vestii ò sottan semper pussee curt! Mi resti lì infadada a vedè sti cambiament! Però quand slonghi on'oggiada da la filidura de la pòrta del bagn, riconossi pù quella stanza, perchè l'è on mes'ciòss de vestii, scarp, cappei e salviett spantegaa depertutt! Intanta che hinn ciappaa a fà i fòto apòs, denanz, dedree ai mè piant e i tosann paren fior 'penna sbocciaa in la serra de la vita, senti sonà el campanell de cà. L'è el mè fioeu insema a on para de amis che hinn giàmò rivàa a cà de l'uffizi per vedé de visin "le modelle". Se dann on gran de fà per preparà i aperitiv e comincià a "tacconare" come disen i giovin, quand fann el fil a ona quai tosa. La conversazion la ciappa ona bòna piega e per minga lassà perd l'occasion deciden de andà tutti insema a mangià on quaicòss, finii de lavorà. Sistemada l'attrezzadura e caregaa scatol e cavallett sora on furgon de la ditta, le due "modelle" sparissen in bagn, per rinfrescass. El mè fioeu e i sò amis hinn sù de gir al penser de passà ona serada cont on para de bei tosann. Dopo ona bòna mezz'ora, voeuna di tosann la ricev ona telefonada per la sostituzion d'ona"volante" a ona sfilada de moda. In d'on bòtt, senza saludà nissun, la spariss dent a on taxi. Compar l'altra a pass felpaa grazie ai scarp de tennis. La montadura de manichen l'è sparida e senza on fil de trucch, vestii de seda, collan, orpei e scarp cont el tacchett, la par ona tosa qualsiasi con sù on para de "jeans" sfilaperaa e ona majetta larga e longa che la scond ogni forma. El mè fioeu e i sò amis se scambien on'oggiada d'intesa... che delusion! Dove l'è restada la bella tosa, la "modella"? L'è domà sui pagin del depliant per on concors ch'el prometteva on viagg a chi rispondeva a certi "quiz"... a propòsit i domand per partecipà al concors come mai nissun mi ha faa? Riva la vos del mè marì:"... e ti te credevet che mett a disposizion la nostra cà per fà on servizi fotografich con la scusa de rimirà i tò piant esotich el saria staa asèe per scroccà on viagg gratis alle Bahamas? Eren tutt ciaccer, e vialter, ti, el tò fioeu e i sò amis... avii boccaa!"... di Ella Torretta da SCIROEU de MILAN