Maria Brusotti

Poesie


*********************



CIAPPEL... CIAPPEL!


On raspusc cont i bisc e duu oeucc negher che sorrid alla vitta
cont on fa metà trist e metà alegher el sa ch'el gh'ha de andà
senza fermass
come se'l fuss on gioeugh
in d'on mond metà sògn e metà realtà. El corr come ona bissa
in del mercaa
el branca on pòmm
dal cest d'on ortolan
e via ch'el va, a coo bass, senza voltass Per Lù, adess, questa l'è libertà
(ghe tajaven i man al sò paes)

Ma 'na guardia le branca: alto là!

Lù 'l spua in terra el fuston del pòmm; poeu ghe daran 'na medaja al sorvegliant (ch'el lassa scappà da la prison i brigant) 
ma a brancà on fioeu se sent inscì important. E quell poer nano, vegnuu dal paradis,
in terra l'ha trovaa dolor senza sorris.



COMPAGN DE MÌ


De giovin el faseva el rottamatt
ma 'i s'ingegnava d'imparà on mestée

Semper negher e vonc come on pilatt
fin che l'ha mettuu bottega de ferrée

On tanabus ch'el stava in la mia porta
e lù, dent, ch'el ravanna con passion
in d'on miscmasc de robba d'ogni sorta
tra tocch de ferr, de ramm e de lotton

E giò ch'el picca, el lima, el torniss, 
fiamma e bocchell e a pocch a pocch je giusta
e de mort che pareven dess fann mostra
'na sferla de lus in del scur d'on canton
e paren fin d'or i strataj de lotton. 

El va in sù l'uss, finida la giornada
per godè del sò sigher 'na boccada
e tra i nivol del sigher che se smorza
(riva nissun per lù) 'l sara la porta...... 
............Compagn de mì..... 

Gh'avevi in del cervell on cantonin
doe rastellaven per fà sù on ballett
paroll e sentiment; staven visin
a cruzzi, sogn e letter d'alfabett. 

Dess in sù 'l mè tavolin, piatt come on banch
gh'è domà carimaa, penna e foeuj bianch. 

La mia memoria oramai la và in stondera
sentiment d'ona volta? ... varen pù
paroll che tocca el coeur hann faa ragnera, 
hoo perduu el tramm e stagh adrée posspù.

Imprestom, ferré e, el tò rampin de ferr

Sari bottega e tiri giò la cler! 



FOEUGH


Viscor e ross
come on tocchell de sô
che'l scalda
che'l carezza 
che'l dà vitta.

Pura sorgent
de lus e de calor
che 'na quaj volta el brusa,
come l'amor.

Foeugh in la nott
sperduu foeura de man
lusor sinister
de coverton brusaa:
on viv strasaa,
senza incoeu nè doman
de barbon, de tosann.

Foeugh che scrizza,
sconduu in la memoria,
sbirr che volen
sù per el camin:

Fogoraa de cà,
e te se scalda 'l coeur
senza parlà



OSPIZZI


Chicchinscì conta pù nient
l'è assee vess ubidient,
stà settaa nel corridor
dove nissun gh'è che pò corr.

Dobiada su ona panca
cont el coo che guarda in scòss 
de lontan la se ved nanca
contra 'l sô a scaldass i òss:
l'è ona veggia de l'ospizzi
oramai domà ona forma
voeuja, che la fà stremizzi,
la someja squas a on'ombra.

Ona man dent 'al scossà
la tegn sald on tòcch de pan
e in l'altra la coròna,
l'è tutt quell che la pò fà.

Se sà nò se la mastega
o, inveci, se la prega:

Paterave, pan moeuji
hinn tutt duu per non morì

Vun de là - l'alter de chì.



VIV INSCÌ


Vèss moderni! che frenesia
senza regol senza orari
basta moeuv la fantasia
Quest l'è on mond all'incontrari
E per minga restà indree
anca numm ghe vemm adree.
Vedarem senza binari
on tramvai che corr perari
ch'el se ferma con la man
giust arent del nost ripian
E per chi voeur nò andà a pee
'na cintura a "retrorazzi"
impiantada sul dedree
Semm o nò padron del spazi?
Nò parlemen di emozion
dess l'è assee schiscià on botton
'Me se fa a sentì el savor
d'on basin, d'ona carezza,
usmà on fior, parlà d'amor?
Viv inscì me fa tristezza.
Per conclud, on bel pacett
on gustos piatt de spaghett
(fa de ferr) e de bullon
savorii col rosmarin
Damm a trà! Te ne voeuret on ciccin?

Viv inscì l'è nò per mì
Hoo decis... voo su la luna
Ma me tocca d'inventà...
on quaicoss che mena bon...
hoo trovaa la novità!
on cornin porta "fortuna"




da: SCIROEU de MILAN