Giuseppe Peraboni 

Poesie


********************



IN D'ONA NÒTT DE STELL


In d'ona nòtt de stell
mi seri in viagg vèrs casa mia,
voeuna de quij sêr de famm sentì allegher e sotta a on scenari inscì bell.

Intorna a mì 
on'ariettinna fresca e profumada
cont ona voeuja de brasciala sù.

Nissun in gir
via de ona quaj lusiroeula;
poeu spariven anlor.

Restava soll el frecass di mè pass, pass che andaven in là
denter in del silenzi de la nott

Inscì me sentivi content
anca perché
in quell moment
gh'era el luzì
de miara e miara de stell
desora a mì



L'È SERA


E stracch de la giornada
son chì sul vialett del giardin intorna la mia cà.

On ciel sora de mì
tutt pien de stell
e on'ariettinna, de fa caponà
la pell.

Dennanz a mì tuscòss che dòrma
foeura d'on gri col sò cri-cri
d'ona tegnoeura
che me passa rasent de famm stremì
e 'na quaj lusiroeula
col sò ciarin.

E giren e giren in del giardin
intorna ai piant e sora la verdura apenna bagnada col d'acquador.

Lontana ona campana
la segna i or.

E mì lì in pee
a respirà quell'aria fresca
che la riva de la montagna
cont el scur de la nòtt.

Poeu dasin-dasiòtt me slontani
in silenzi, senza premura
per minga romp l'incant
che pòcch o tant... l'è quell de la natura. 



O MADÒNNA DEL CIEL


O Madònna del ciel,
tira el tò vell
sora l'umanità
perchè senza de ti semm pù se fà

Cont i tò oeucc
tutt pien de lacrim
guarda on poo sul tò mond
e 'sta gent che l'ha pers la Fed,

La cred de dominà

Te vann in sù la Lunna;
ciappen de mira i stell
ma senza ti,
gh'hann on bel dì,
ch'hinn semper piccol
gh'hann semper de imparà.

O Madònna del ciel
sent scolta i orazion
de tanti malaa,
de tanti bon!

Insemma spettom
el tò miracol,
el tò miracol
sù tutt el tò creaa.

Ti te see Santa
ti te see pura
ò nòstra Immacolada Concezion

Insemma ai Angiol che te fann corònna, l'umanità la spera
in la toa grazia
el tò perdon.



SPERANZA


Voo in gir pian, pian
coi man de dree
vardi la gent,
me fermi, pensi;
me piasariss savè
cossa la pensa

Cognoss i bon
cognoss i cattiv...
l'è minga facil
varda quell là
che faccia ciara
varda quell'alter
che faccia scura.

La veritaa?
Ma chi me fermi,
me ciappa la paura:
paura del mal
pussee che'l ben.

Cambi penser,
cambi vision
te là i fiolitt
par de vedègh in man
on ramm de oliv.

Varda' me salten!,
paren gott de rosada
fresca, tremorenta
su on fior che'l se slanza

Denter de mi
quajcòss se moeuv
e el corr...el corr
on fil de la speranza.





da: SCIROEU de MILAN