Gino Toller-Melzi


da: SCIROEU de MILAN



L'USS SARÀ

La gioventuu l'è andada
de on pezz, ma scusi senza:
adess gh'hoo l'esperienza
per minga fà on'asnada.

Gh'avevi chì in del coeur
quaicoss... come on fastidi...
'dess se ghe pensi ridi:
son guarii se Dio voeur!

Però per la paura
del ris'c de tornà indree
a sto mè coeur badee
gh'hoo miss la saradura;
a sto poer coeur mincion
gh'hoo miss on cadenazz,
l'hoo armaa con di corazz
che sfiden i canon.
col coeur pien de voiamm
Signor! 'me se sta ben!

Son viscor e seren,
gh'hoo minga de ligamm.

L'è inutil vegnìa batt
a l'uss: l'è saraa sù.
Chì se ven denter pù,
sigura: gh'è su el gatt! 

On bocchin sorident,
on para de oggion bei
me fann cambià nò idei,
mudà de sentiment:
gh'hoo minga di biedrav
o di nos in del coo!

Al massim ve diroo
dove hoo sconduu la ciav.