Koolnal
Eleuterio Llanes Pasos
Lenlen cu bétic yum Chaac. Zohol cu lízic mózón. Ch'ich oob cu caxtic u k'uoob bin u caah u k'azal ha. Uk'ah luum, uk'ah luum, uk'ah u cheiloob k'aax, uk'ah uínic, uk'ah ch'iich'. Dzocán in tóquic in col, mimizquí tu zútul pach, k'ancab tzutzuy xinbatic, tu hal cu k'ayoob yalbach tu tazcoob u tunben k'uoob. Xiim yétel buul, beyxán ic yétel in xuul quin pak'ic ; in haamah in loche xan utial in páctic u pach ; yan in pak'ic cap'el is yétel chicaam yétel dziim. Quen in hoché, u yax nal, yan in k'ubic hanlicol ; k'ábet u hanaloob xan nohoch tatoob can tiitz caan : lak'in, nohol, chik'in, zamán.