Briseida Cuevas Cob
Je'iiiiiiiiin, je'iiiiiiiiin,
in x-kíichpán na',
żleti' uae ák'ab tan u ji'ik u sen ba' chauakil uayak' tin uich
ua jach jaj dzu tudztal a uínklil,
bey chan tzutzuy,
u tial ma' u suut xik'nal ?
Je'iiiiiiiiin, je'iiiiiiiiin.

Je'an in tzem tumén u mo'l k'ínam.
Jila'an in uol tumén k'om ólal,
jula'an tumén loob.
Je' in pixán
u chaachmaj u yok a pixán ku tuuch'u je bix u buudzil in k'oben,
in na',
tumén u ch'ajumil a puksík'al
dzok u jáual u t'a'a'aj  t'a'a'aj t'ojt'ojánkal ti' u che'il a tzem.
Je'iiiiiiiiin, je'iiiiiiiiiin.
żTuux ka bin u tuuk' in uich ?
żTuux ka bin u sáasil in páakat ?
żBaaxten ka p'atiken ichil u sen ba' bóoxil ák'ab ?
Je'iiiiiiiiiin, je'iiiiiiiiin.
Dzok u muudzul a chan ich
u tial ma' u suut a paktén.
Dzok u nup'ul a cha chi'
u tial ma' a suut a t'anén.
Je'iiiiiiiiin, je'iiiiiiiiin.

Uy ba' yájil u leeche le muk'yaj tin puksík'al,
uy ba' yájil u yu'ch'ú tumén le muk'yaj in puksík'al.
Ua juntenak tin k'olaj a uich yétel u chichil in uol,
much sá'asten in na', much sá'asten.
Ua juntenak tin k'ilaj a munmún xikín yétel u k'asil in t'an,
much sá'asten in ko'lel na', much sá'asten.
Je'iiiiiiiiin, je'iiiiiiiiin.

Uy ba' síisil u xíibil in puksík'al,
síis je bix u síisil a uínklil tudzukbaj bejla'o.
Uy ba' k'ajil u yélel u nek' in uich,
k'aj je bix u k'aab in tuub k'ala tin kala.
Je'iiiiiiiiin, in x-kíichpán na'.
Je'iiiiiiiiin, in x-kíichpán ko'lel na'.
Je'iiiiiiiiin, je'iiiiiiiiin.