'O cunto d''e ccose piccerelle

Achille Serrao

*******

Chiù assaje 'e ll'at'anno s'arrapecchia 'e fronna
azzelisce s'abbocca comme vò
Ddio ('o Ddio 'e tutte 'e fronne) stu ddièce 'e patatèrno
nu poco 'nzallanuto 'a cunnulèa
speresce 'a fronna jétteca - e isso c''a cuffèa.

Aria pe' naca, è overo, chisto è 'o cunto
d''e ccose piccerelle piccerelle
pure si scasualmente chella fronna
fosse d''e fronne ll'urdema: che va
truvanno a Cristo 'nt'ê lupine mo'
cu ll'aria 'nfuscatella che 'ntorza
('a tene 'a forza) 'ncuoll'ê fraveche na nuvola
ddoje nuvole zurfegne quanta nuvule po' (nce prode 'o naso)
e appiccia 'o nniro 'e ll'uocchie
'ncielo?