Raffaele Viviani

'N Giulina 
'A Mamma 


*********************



'N Giulina 


Ogne vota ca veco a 'Ngiulina 
sciacquà''e panne 'int'a tina, acalata, 
m' aggia fa' na mez' ora 'e guardata, 
e 'o penziero cammina, cammina. 
Accummencia a lavà' d''a matina: 
ogne ghiuorno se fa na culata, 
e 'a vunnella 'int''e scianche, scurciata, 
cchiù s'accorcia, cu 'a capa 'int''a tina. 
E io ca stongo 'e rimpetto cu 'o vascio, 
levo ll' uocchie, ma ll' uocchie llà vanno; 
e guardanno guardanno, m' accascio. 
Nu suspiro e lle dico:--'Ngiulì'! 
Essa ride e, turcenno nu panno, 
cchiù se move, pe' farme suffrì'.


**********************


'A Mamma 

'A mamma è n'ata cosa: 'o cereviello, 
ll' asse d''a casa, 'o sciato, ll' armunìa; 
è chella ca cumanna 'a cumpagnia: 
sta 'ncapa 'o capo 'e casa, è nu cappiello. 
Attuorno tene sempe nu ruciello, 
abbada a mille cose, fa 'a Maria; 
e si nun sbatte pe' na malatia, 
va ascianno sempe ll' ago cu 'o rucchiello. 
A chi nu punto, a chi na cera storta, 
a chi nu vaso, a chi n' avvertimento. 
E se capisce 'a mamma quann' è morta, 
quanno nun ce sta cchiù sta scucciantona: 
ca pare ca t'accide ogne mumento e, 
doppo nu minuto, te perdona.