Eduardo de Filippo

TITINA MIA... 

Titina mia, 
Titì... 
Che t' aggia dicere... 
Si te tenesse ccà pe' nu mumento, 
pe' na mez' ora, 
n' ora sulamente, 
desse diece anne 
'e chesta vita mia, 
ca vita cchiù nun è 
ma è sempe vita! 
T' appujasse sta capa 
ncopp''a spalla 
e te dicesse: 
" Fino a che sto nterra 
e ssongo vivo 
simmo ancora nuie!" 
Cu ll' uocchie dint' a ll' uocchie 
t''o dicesse... 
E a gocce a gocce 
se nfunnessero 'e mmane 
'e tutt''e dduie.