Mal'aria     
Autore: Achille Serrao  
 

 
 

C'è rummasa 'a scumma d''a culata mo'
na chiorma 'e muscille che s'aggarba
pezzulle 'e pane sereticcio quacche
"silòca" 'nfacc'ê pporte arruzzuta
e 'o viento nu viento ahi na mal'aria
'a quanno se ne só
fujute tutte quante secutanno 'o ciuccio 'nnante, 'e notte
c''a rrobba 'a rrobba lloro ('o ppoco pucurillo ca serve e tène)
e 'a pòvere s'aiza 'int'a stu votafaccia
pe' ll'aria che se tegne d''o janco d''a petrèra.

Pe' tutt''a scesa ruciulèa 'a ggente p''a scesa
scarrupata 'e ccarrettelle d''a ggente
ruciulèano pure d''a ggente chiòchiara
'nzevata 'e suonno ca nun sente
chell'ate ruciulià e parla a schiòvere
stanotte parla 'e pressa a una voce
essa ch'è sulamènte voce.

Se ne só jute muro muro da
'o maciéllo 'a vetrera 'a dint'ê ccase
appuccenute sott'ê ciéuza senza
vummecarìe e mmanco na menata
'e chiave, ll'uocchie asciutte se nn'è ghiuta
'a ggente parlanno addò va va
viate a lloro e a chillu Ddio ch''e ffa campà.





Mal'aria

C'è rimasta la schiuma del bucato ora / una marmaglia di gatti che assapora / pezzi di pane muffo qualche / "affittasi" sulle porte arrugginito / e il vento un vento ahi una mal'aria / da quando se ne sono / fuggiti tutti quanti seguendo l'asino avanti, di notte / con la roba di casa (il poco poco che serve e si mantiene) / e la polvere si solleva in questo voltafaccia / nell'aria che si colora del bianco della pietraia. /
Lungo tutta la discesa ruzzola la gente, lungo la discesa / dirupata i carretti della gente / ruzzolano anche della gente zotica / fatta di sonno che non sente / le altre ruzzolare e parla a vanvera / stanotte parla in fretta a una voce / lei che è soltanto voce. /
Se ne sono andati muro muro / dalle fornaci dal macello dalle case / rannicchiate sotto i gelsi senza / smancerie e neanche una mandata / di chiave, gli occhi asciutti se n'è andata / la gente parlando dove va va / beati loro e quel Dio che li fa campare.