LUCIANO SOMMA

VICO NAPULITANO

* * *

E' sarracena 'sta strada 'nfosa,
'na fila 'e vascie,nu vico chiuso,
so' gocce 'e chianto sti panne spase,
na stanza pare ch'e' nu pertuso.

Fenesta vascia cu' na Maria,
ca me faceva sunna' l'ammore,
t'hanno 'nzerrata cu' na buscia
d''o terramoto ch'e' senza core.

Chesta canzone,canzone amara,
porta 'int''e nnote cchiu' 'e nu dulore
quanno se perde na cosa cara
se po' asci' pazzo,ce sta' chi more.

Na mana sfila 'int''a sacca onesta
na vocca strilla 'nfaccia 'e prumesse
e' sulo 'arraggia chella che resta
quanno nu popolo e' cuoppo allesse.

'O vico ajere nun era santo
si l'attuccava te deve 'a mano
ce steve 'a risa,ce steve 'o chianto,
era nu vico napulitano.