Po' vene juorno     
Autore: Achille Serrao  

 

 
 

Cammenata ca me struppèa 'o suonno
na notte sì e n'ata notte pure
passiata va' sapé comme cumposta
'ncopp'a chest'ossa... e dint'ô suonno raggiunià
'e sta vita, 'e chella ca nce steva ma nun sia
maje s'avesse 'a lepetà, dicive scutulianno
'o janco 'e chella capa
janca, d''a vita 'a venì
nun bella, 'a verità, e mmanco malamènte
sulo nu poco lasca... lasca sì...
parlammo d''e fatte che se 'nfossano
comm'a néglia 'mpannuta e nun se 'nténneno
chiù manco 'a vicino, d''e ccose piccerelle
ca nce sfessano (na malatìa 'e còre... na fresélla
chistu mese... ll'àsema ca vò dòrmere e nun fa
durmì, tésa pe' ttésa 'o cagno
d''o quartiére)... e rusecammo cu na voce
abbrucata 'ncopp'ô mmeglio
pe' nun ce fa sentì pe' nun fa sèntere
'o mmale, e ttanto, c''o dulore fa
quanno te zuca 'nfunno 'a lummèra.
Po' vene juorno.





Poi si fa giorno...



Andirivieni che mi storpia il sonno / tutte le notti / un andare e venire tramato chi sa da chi / su questo corpo ossuto... e nel sonno ragionare / di vita, del passato ma non sia / mai si dovesse ripetere, dicevi scuotendo / il bianco di quella testa / bianca, della vita che sopravviene / non bella, in verità, ma neanche insopportabile / solo un po' allentata... lenta sì... / parliamo dei fatti che si addensano / come una nebbia densa e non si comprendono / più neanche da vicino, delle piccole cose / che ci sfessano (un male di cuore... un colpo / questo mese... l'asma che sonnecchia e non fa / dormire, rampa per rampa lo sgombero / di casa)... e bisbigliano con voce / arrochita sul meglio / perché non ci sentano perché non si avverta / il male, e tanto, che il dolore fa / quando ti succhia in fondo la luce. / Poi si fa giorno.